.

Ishq mein Gairat-e-jazbaat ne rone na diyaa
varnaa kyaa baat thii kis baat ne rone na diiyaa

aap kahate the ke rone se na badaleinge nasiib
umr bhar aap kii is baat ne rone na diiyaa

ronevaalon se kah do un kaa bhii ronaa rolen
jin ko majabuuri-e-haalaat ne rone na diiyaa

tujh se milakar hamein ronaa thaa bahut ronaa thaa
tangi-e-vaqt-e-mulaaqaat ne rone na diiyaa

ek do roz kaa sadamaa ho to ro le 'Faakir'
ham ko har roz ke sadamaat ne rone na diiyaa

-- by Sudarshan Faakir.